TLta nuestra tierra es linda en qualquiera tiempu del añu, peru es ena primavera quandu las hesas i vallis estrumpin en coloris, goloris i vida. Emboeci de vel una tierra tan rica a aflorecel i lo que más mos susprendi es que Ella propia lo hazi sin eshuerçu, sin aforçal ná. En estas fechas s'emparejan los páxarus: los pardalis altereaus rebullin polos tejaus i las cigüeñas se ván assentandu desajenus delos sanvalentinis consumistas. Qué l'importan alas xaras de nusotrus quandu luzin la su frol entre la fusca del monti? Pocu miran los chamarinis, xilguerus o andorinas por naidi más que por cudial de hazel lo que es propiu en estus días. Sin embargu, velaquí el ombri: aginau él entre papelis, entre gabarrus, atollau en una vida desacompassá del mundu... La coltura modernista no está cona naturaleza, no puei estal cona naturaleza porque no respeta otru calandariu que el delas agendas tupías. Ai que hazel muchu de tou, mesmu angunus recomiendan que el dupli, pa produzil un qué-sabemus-allá que mos enfoncha enas pantallas, desapartandu-mus dela ventana i sorviendu la voluntá de salil.
Es esta la coltura que le precuramus alos muchachus? Pos velaí! Ondi están que no corrin conas becicletas a ençalamal-si o achancal regatus? No ván a níus porque no sabin osserval los páxarus. Ahuera el mundu revienta en sensacionis andi una tierra comu la nuestra las ofreci a trocu de ná. No vá a llegal fatura nenguna a final de mes con el conceutu de "passeu pol campu", "golisqueu de froris" o "ascucha del cantu dela rola". Sin embargu, los estremeñu mos escarriamus en essi afán de querel correl conos tiempus descaeciendu-mus delo que val la pena: dexamus de comprendel la tierra ena que vivimus pa sabel de "bobás que no valin ni siquiá una perra", enas palabras del poeta.
