Por qué s'empeñan los dialectólogus, lingüistas, antropólogus en dizil que las lenguas amenuías están muertas? Con essi pensamientu no concederán essas lenguas conserval-si! Se declara assín la voluntá que ai dela genti toa palral una mesma cosa, vivil duna mesma manera i pensal tós igual. Sin embargu, por muchu que s'afanin las academias en ofrecel ingrés, alemán i chinu pala moceá ahuyil, siempri averán enos puebrus genti que sostribi lo propiu pa no achorchal assina lenguas maternas i pensaeru propiu dandu la merendilla a un Mercau lambuzu, tragahavas i desagraecíu.

Pos velaquí que'l viernis 31 comprovemus en Malpartía de Prasencia que assina no es. Aviau por ADEME i con el sostribu delas associacionis colturalis se celebró una jorná pa dal un vencijón al estremeñu de Malpartía i dela Serraílla, ondi el interés i las ganas de hazel por parti delas associacionis colturalis (Amigos del habla de los chinatos, El duendi: en cata delo nuestru, OSCEC) i dela genti que aprecian la erencia delos de patrás están por cima delas estadísticas, incuestas i estudius trasvelaus. Pa más señas, velallí 'Territoriu de Bandolerus'. Estu es assina porque, comu asseñaló Carlos Canelo aquella tardi, "la lengua es un valol social" i los palrantis arreparan de continu en cómu múan las maneras de mental las cosas por causa dun tiraeru que vien dahuera. El compromissu i el trebaju por juntu d'associacionis, palrantis i l'Almenistración empataratarán el passu del avantu delos usus modernus que quieri de hazel delas lenguas más desaprotegías el refugu delo que son. La coltura delos nuestrus puebrus precisa de genti ralidosa i trebajaora que apreciandu lo que erearun no lo suelti pa agarral lo que le imponin ala chichicalla. Velaí-lus los serraillanus i chinatus!