Quandu la sociología nombró hadrá un sigru aquellu de mass culture no sé si leyerun de Juvenal ai dos milenius que la genti alampava pol dos cosas namás: panem et circenses . Omeru quantu á, quandu mentava d'alguien, le dizía sitophágos 'que comi pan', peru porque le dava comparança conos diosis ambrosiacus. Agora que otrus son los diosis, comu asseñalemus la semana passá, mos dizin mass i se quean tan a gustus. Pos velaí. Peru no mos dimus a enreal conos nombris, que ya sabin ustés que la filología me pilra i denseguía m'emboçu. Lo que diva a dizil era que essu que llaman mass culture i traduzin en el chapurrau global 'cultura de masas' ná tien que vel cona coltura tradicional i, sin embargu, es la que la está machandu contra el morteru pa condimental el bervaju que mos echan andiquiera que miremus. Essu es velaí algu que resulta mu aparenti i sabin hazel mu bien: el disfrutal dela coltura de manera gandinguera. Ata ai pocu tiempu, la coltura l'aprendían los ijus delos pairis i avuelus i se platicava i se compartía en casa, ena calli o en el campu. Essa coltura no tenía un propósitu, más que servil de librinu d'estrucionis pa entendel el ambienti i adatal-mus. Sin embargu, agora la coltura se piensa en salas con gráficus, letrerus i númirus i arreglu a essu vein quántu beneficia (en perras) i assina tanteal lo rentabli del assuntu. Ata no sel la coltura tradicional rentabli, cosa que nunca sedrá assín, no vedremus lo aparenti que puea sel hazel bilmas, destinguil l'arvejaca del'arvilla o si la miel quita las llagas. Tó essu no es negociu: sin embargu, mercal boticas i arvillas encongelás 'mueve la economía'. No sé si la coltura que se vendi comu una lata de sardinas mereci essi nombri, no siendu algu que cautiva la genti si no que consumi.