TAti dos semanas s'ajuntó en Caçris la Federación Extremeña de Folklore en días de convivencia i aconllegamientu. Una ves al añu quean los grupus associaus pa compartil esperencias, bailis i cantaris i pa hazel algu bien curiosu: cordinal las pieças que tocan, cantan i bailan. Ca añu ván cordinandu varius cantaris, más eno tocanti ala música i ala manera de bailal. Assín poíamus vel los de Agla del Montiju, Savia Viva de Coria o Alonso de Mendoza dela Garrovilla i los grupus estremeñus dendi los Mairilis acompassandu sonis i passus. Drentu dela variedá de letras i tragis que tienin los puebrus estremeñus, vidun bien que la referencia dela entrepetación huera la mesma entre los grupus associaus, un acompassamientu del andal coltural que farrunga el conceutu del "espíritu desunido" que Gregorio de Salas con tanta asperés dixu de nusotrus.
La música uni las almas, las distrai del gabarruñu que la pessona buhía cría cona distancia, no comprendin? Pos entri que la música ajunta, la lengua pareci que desaparta, sin poel sacal dela ceguera muchus delos que dizin "pues en mi pueblo así no hablamos". Cordinal una lengua es compricau, más una comu'l estremeñu, hata ai pocu oral.
Sin embargu, drentu dela comprexidá dela diversidá, hallal la huélliga compartía es más cenzillu delo que pareci. Lo que es que el estremeñu no es avi de passu, sino enzina milenaria con destintas ramas que atienta quasi que tolos puebrus estremeñus (i más pallá). Renegal d'esta enzina de palabras pa ponel ucalitus es çaleal la hesa i el monti ondi los estremeñus entendemus el mundu. Quien estu has, se desacula delos viejus que sí s'entiendin cona hesa, porque vei más rentabli una ribera recinchá con ucalitus, que no el çaós, el fresnu o la enzina.
