Acaba juniu comu otru mes qualquiera, dispués de pural-mus conas lumbris antigüíssimas de San Juan, derrengandu los cuerpus más huertis la campaña dela picota, las ciruelas i el malacatón. El veranu siempri supón una revolución enos puebrus, que s'enllenan i tupin de familiaris i los emigrantis vienin alas sus casas dendi mu largu. Ellus, tras de echá-li el bervaju al ganau ajenu, suspirandu pola tierra dela que la necessiá obrigó a ahuyil, vuelvin a acupal las casas fechás duranti mesis o de uéspedis en cá la familia. Esti uéspedi que retorna costitúi toa una estitución en Estremaúra, que recibi cariñosamenti por parti delos daquí nombris comu gruñiol , arrebañaorças o limpiadispensas , por que quandu vuelvi a dil-si, vá con él, fueraparti dela lástima dela arrancaera, mediu uertu i media matança. Amás d'estus estrebejilis familiaris, enos puebrus mos apreparamus pa verbenas, conciertus, bailis, cini i semanas colturalis conas que entretenel grandis i chicus, en el afán d'arrellenal el desoficiu veraniegu. La Federación Extremeña de Folklore está conos preparus del espetáculu delos "Puebrus del mundu" por Estremaúra i Portugal, truxiendu pa estus mesis lo más floreau del estrangeru en un entrecambiu musical estrordinariu. La música lo atraviessa tó i con ella la coltura, porque naci en compartiendu perantonis, picaus i rondeñas conas piruletas i cambaluzis delos dançaoris arrexaquis del salienti uropeu; en afrentandu tamboris de piel de cabra con bongós; en clissandu-mus cona sonrisina delas nuestras moças xaquetonas enos respingus, revoleandu las sayas, i engamonitandu-mus conas branquinas i ducis delas russas o polacas que avantan, quasi que frotandu, pol ecenariu. Si compartimus lo propiu, ai coltura; tendremus perda si d'ellu mos desaculamus.