Los griegus tenían una palabra pa mental la osservancia i el buen enfuncionamientu delas leis i el ordin: eunomía. Solón, governanti d'Atena en tiempu de crisi, no aginava la genti con cochis con altavozis, ni diva alas praças a que le tiraran retratus i seguramenti tapocu suava ni leía papel nengunu quandu defendía el su pograma políticu. No lo precisava, porque era ombri de letras i de mundu que sabía los poblemas que tenían ena su capital i que pa arreglá-lus tenía que amedial entre tolos bandus que avían.
El propiu dizía en el su pograma políticu que "una capital mu quería se quea revenía denseguía por causa delos tramantis en partíus amigus de hazel falseá". Agora que la "carrera por el poder", comu dizin los canalis de comunicación, mos aboca alas urnias, tenemus ena cabeça essa frasi de Solón rebumbandu dixiendu-mus que tós están corrutus. Alo mejol essu es lo que quierin, que'l caciqueu siga siendu caciqueu mentris otrus, con más alcancis, quierin governal más i más quandu no quean enratonaus de tantu que puein i, sin sel escapás de barajal la hartura, mos acivarran en una patocracia desacotá. En tó essu está Estremaúra i estamus nusotrus, bazuqueaus comu una tarra de lechi, sin más oción que vertel-mus o assental-mus. Si estal pendientis delo que mandin delos Mairilis o d'Uropa o de tomal atranquiju i echá-li manu al sinu.
Peru los estremeñus estamus mu verdis, mansiolus perdíus, demasiau comu pa entendel que la nuestra virtú naci polo que amus síu, peru no es lo que mos hazi grandis. Pa sel grandis i vivil a gustu en esta tierra de hesas i montis bravíus ai que conocé-la i tenemus que conocel-mus nusotrus i nusotrus, no conocel lo que otrus dizin de nusotrus. A pocu que comprendamus essu, mos llevaremus las manus ala cabeça i diremus: "qué ciegus amus estau!". El votaeru no mos abarca, no dis ná de nusotrus, porque pa governal-mus bien, tenemus de conocel-mus mejol, i essu, mis amigus, es lo compricau.
