TEtl lucru i el ansia del ombri ni se repara ni s'assujeta. Quandu comprendemus que estu es assina, ya es demasiau tardi. Alos que mos hazi sensación que los yacimientus s'atierrin a trocu del modernismu -cudiau, no dela modernidá- o s'abandonin por no querel aprofundal ena estoria arreglu alas comenencias d'algunus o mesmu que no se respeti la hechura tradicional delas viviendas, que los caminus i cañás tengan angarillas i alambris que los atraviessan o que se permita derrotal el patrimoniu arquitetónicu dun puebru mentris que se acementan el campu i la hesa, se mos arruta el coraçón i se mos añúa el gargüeru. No entendemus que una sierra tenga un propietariu, andi las pieras palran ena idioma delos hoyinus a tentu delas estrellas i delas vidas de patrás, los butris conas sus destensas alas arroean los canchalis i el majuelu, los lirius i la marisselva aflorecin. No mos cabi ena cabeça que'l campu se cerqui sin avel ganau i que las parelis que alevantin ya no sean de piera del propiu campu sino de ferralla o de hormigón. Tapocu no son las casas del campu de granu, piçarra o adobi, pos son de colorinis que tienin necessiá de asseñalal que essistin. Los viejus se recuerdan de quandu en el campu siempri avía genti, unus a çachal i otrus de havalerus o con el ganau i otrus de guardas de caminus i arvoleas o cortijus, peru agora con el campu cortau a cachus conas alambris comu si huera un melón en veranu no se vei naidi por muchus quilometrus que carguin las piernas. I cudia de no vé-lus, porque dirán: "Essu es privau, pallá no pueis passal!". Descubrirás assina que las pieras, las huentis, las costrucionis, las puentis, los páxarus, las riveras i los regatus, los pecis i las ranas tienin amu. Peru si essu dueli, lo que más coragi da es que'l amu no te convidi a vé-lu.
