TAti epocas en el añu que s'asseñalan en el calandariu no por fiestas, sino por trebaju. Son los jornalis echaus enas campañas de veranu, que ván diendu con cruzis junta los númirus del almanaqui, pa no perdel la cuenta. El campu sigui enfuncionandu assina, no es continuu, vá arreglu alos tiempus i ala naturaleza i los que a él se dedican lo sabin bien de más. La fruta emprea mucha genti --ventualmenti, claru--, lo mesmu enos campus que enas coperativas i fábricas. Amus a tornapeón, manigerus i jornalerus s'ajuntan endenantis de clareal al pie delos bancalis (porque los ombris del campu vein el sol salil dispués que echan manu). No importa que los árvulis estén pinganditu por algunu delos charpazus d'estus días atrás, que la calol apreti a más de 42 graus o que'l surcu hunda ata la roílla pol estal regau dela tardi antis: lo que le val al Mercau es que la fruta sea grandi i lustrosa: que las cerezas sean cirgüelas, los malacatonis, melonis i los tomatis, calabaças. Da igual que estén enguachinaus o sepan a botica: los quiel gordus i de buen pelagi. Pa cumpril con El, milenta de parcelerus navegan conos produtus en el goteu i las curas que lluevin delos tomizaoris siguiendu rigorosamenti los prazus daus, amás d'otras normas impagablis pa quairá-lu tó con Uropa. Enas coperativas i fábricas, únicus trebajus que tienin al cabu'l añu muchas familias, las manus i los pies aguantan jornás de ata 13 oras, comu los segaoris, de sol a sol i sin revezu. Las carreteras se tupin con tractoris con comuelgu de palós i trailis que vienin de mu largu a metel enas sus traseras i de manera ordená lo que'l campu cría al torteruelu i entrebolau. Las tierras de regueríu güelin a químicus de nombris imprenunciablis, humu de "veículos longos" i a tierra mojá, verdi tó ata dolel la vista, mientras que enas otras partis d'Estremaúra el veranu assolana los campus i la tierra pareci que çuga los regatus al son dela chicharra.
