TLtos científicus andan en cata del destraci del "conectoma" del celebru, es dizil, hazel un mapa delos enganchis neuronalis pa vel si assina se puei mual de suporti el pensaeru i las recordanças. Embrocal el'agua duna vasija de barru a otra de prásticu pa poné-la ena nevera o cosa assín. Seguru que a cuentu d'estu saldrán muchus cona vos claridosa de Thamus a julgal lo que la cencia de Theuth trai agora, peru essu lo queamus palos espertus, no sea que mos atollemus enas talliscas dela ética. La verdá es que unu se pregunta muchas cosas comu si en essi trocoleu de información s'án de conserval tamién el aziu, el ingeniu, los acuerdus- La capacidá de crial, de maginal, de envertil unus coloris, unas pieras, unas palabras al torteruelu en obras d'arti tendrá la su sinassi combinatoria que alguien paí, con un mapa i la materia, puea conectá-la encima duna mesa. Si el día de mañana cartografiaran los escrivientis que s'ajuntarun en Ceclavín el día 31 pa celebral la literatura i recital en estremeñu i castellanu, el relievi d'essi mapa no diva a trael los desgargaerus, las gavias, las barrancas ni las honduras dendi los que sientin Estremaúra. Velaquí que las letras estremeñas çugan delo que la nuestra tierra da: ella toa son las Musas d'ellus que se mesturan ena reziúra dela anzina, eno amargosu dela nuestra estoria, eno candongu delos nuestrus acuerdus, ena hondura delos ritus i costumbris milenarius i ena dolçura del cielu i las xaras. Retratan vivencias i sentiris daquí, componiendu conos ojus i el coraçón, enxaretandu más recordanças que acuerdus. Falta, sin embargu, que ena juntança d'escrivientis en estremeñu, tamién ellus gastin dun mesmu códigu, paque, entri que sal i no sal el conectoma, siga siendu por mé delas letras el suporti andi mos quein el arti.
