TEtsta semana emprencipió el cursu escolal estremeñu con un bastiol legal nuevu: la LOMCE. Hueraparti del gastaeru de perras i el trastorniju que trai el enfuncionamientu d'esta lei en Estremaúra, comprendemus más que nunca que la enseñança está enviculá ena política i está a tencias d'ella en tó i por tó. Dendi las primeras escuelas del XIX que precuravan la obedencia duna norma que venía dahuera i se mirava el ombrigu, pocu i ná á muau la custión. Ca día vemus cómu la conocencia del entornu ya no está siquiera en manus dela familia i enas escuelas i estitutus está folastera. Prival un zagalinu de conocel el puebru, la genti, las costumbris, la estoria, la lengua materna, la naturaleza dondi vivi es condená-lu al aislamientu, porque engamonitaus conas tenologías quean distraíus i dislocaus. La competitividad no ahinchona pa sel más bichaol i aconllegal cona genti, sino pa repunteá-la, abaxá-la i estralijá-la. En çamargullendu los muchachus enos bardalonis dela economía conos testus del emprendedor , el ingeniu s'embrueca namás que ena capacidá d'engardillal pa no venil-si bolu. En essi mundu del farulleu i el maquineu, ondi las letras, la estoria, la lengua i el arti no cogin, ván saliendu muchachus sin areté , sin el aziu bastanti pa crial i valoreal lo propiu, con un ánimu engajerau, sin endonal-si con más naidi que con el Mercau, bamburral bravíu delas escuranas del ombri. Ata las idiomas s'estudian pola sintassi, enteramenti empelotás dela coltura que se trasmiti por mé d'ellas! En el mundu ondi la segurança se fingi a trocu del mieu, los comprementus circustancialis namás son garrapatus en una frasi i la literatura es numeral títulus de librus, se forjan los ombris del futuru i d'ellus vendrán los panis que nengún Omeru volverá a referil en poesías.
