La variedá de coltura atorga riqueza alos puebrus, pos en compartiendu ca unu la vista que tien del mundu, se crían lazás de verdaera fraternidá. Has la mesma sensación que la hesa en primavera, no me cansaré de dizí-lu. Sin embargu, quandu s'agarran estereotipus pa imponé-lus comu única vía possibli, causa el mesmu desgalaçu que las máquinas que están arramplandu cona Amazonia, porque es propiu del ombri ençurronau pintal con pintura verdi la tierra de ves d'asperal la naturaleza hazel lo suyu. Quea drentu del "typical Spanish" la identificación de tolo que puean sel fiestas cona manera que tienin los andaluzis d'entretenel-si, mandamientu que perteneci a essa impresa que dizin Marca España i cona qual buscan la venta dela coltura. Tolo que daí se sal, s'abarranca i acaba por desparecel-si. Los estremeñus, que queremus más de boca que conos hechus lo nuestru, toleramus que una feria, comu es la de San Juan en Badajós tenga comu santu en un letreru una moça con el hatu sevillanu i sean las corrías de torus el ceviqui. Que adornin las callis de brancu i colorau, con "farolillos" i sonin sevillanas enos arradius delas tavernas devi de hazel sensación, tanta comu la duna muestra de graffiti i hip-hop o un espetáculu de zumba . Peru antigual d'aprovechal una feria tan asseñalá comu es San Juan pa promovel lo propiu, damus propaganda alo folasteru i damus a entendel que mos desaculamus dela nuestra coltura verdaera. Namás aquí semus escapás de dal la bienvenía al veranu no con agua i lumbri, sino bailandu sevillanas. Quandu los tamborilerus dexin d'animal tamién la feria en Coria i junta'l capaçu ardiendu canti el coru rocieru podremus dizil que amus muertu comu estremeñus: la nuestra Amazonia coltural están en paragi de farrungá-la cona maquinaria de lunaris.
