Dizía el protagonista del Mandarim , dispués de rogal baldíamenti que acabara la maldición que lo aginava, dizi: "Agora o mundo parece-me um imenso montOo de ruinas onde a minha alma solitária, como um exilado que erra por entre columnas tombadas, geme, sem descontinuar". Una sensación de disloqui semejanti es la que agina los estremeñus quandu vemus andiquiera las ruinas delos de patrás. Vivimus en el paraísu románticu dun quairu de Friedrich, peru comu quien vé una piera i sin julgal la quita de sitiu por estorval. La conseña dun passau que no s'aprendi enos librus está tirá al torteruelu. Por tolos laus vemus pieras labrás, ermitas derrotás, molinus i lagaris esbarrucaus, castillus farrungaus, buhíus esboronaus, cortijus aburríus i puentis caías. No olviamus tapocu los silus, navis, edificius modernus que tamién son palombaris. Costrucionis que namás sabin aprecial las çarças i los páxarus: estoria que dexamus perdel, no ya comu si huera un recramu turísticu, más bien comu parti de tolos estremeñus nacíus i que naçan. Que un edificiu llevi un títulu i una mentación en una lei no le da más añus de vida. Tapocu que s'adecenti una ves pa ponel un letreru al lau. Se precisa de cudiu, atendimientu i perras, peru más que ná de concenciamientu. No poemus consentil que caiga la puenti vieja de Talavera la Real, el conventu de Luriana o la torri del castillu de Treveju sin antis no sentil cómu si mos arrancaran un remu. Las obras delos ombris tamién son dinas de almiral-si porque en ellas está el suol de muchus braçus, la pacencia i la sufrencia de mucha genti i las vivencias que en ellas está. Agora el estremeñu es quandu s'alamenta por perdel tó essu, quandu namás quean los assientus dispués que otrus se bebieran el café. Es por essu que vivimus en una cancamurria contina, sensación de ruinas al reol, eternamenti acachinaus, ata que la piera labrá i la del canchu vuelvan a sel la mesma.
