Unu delos grandis estáculus que encuentra el divulgaol del estremeñu i, polo corrienti, de qualquiera lengua amenuía, son los prejuízius. La huerça d'ellus vienin pola inorancia o el descaecimientu dun patrimoniu que es imaterial i otrus se produzin por causa delas vivencias, muchas vezis referías comu anegóticas, que tuvun comu tema la lengua: un castigu, una puesta en vergüença, un malentendíu, un insultu-
La unión de dambas cosas, inorancia i vivencias, has que toa una coltura oral estén en paragi de desparecel-si. A estu añidimus, que no es paja, la custión dela coltura modernista cuyu bacharoleu es el de tós palral i pensal dela mesma manera: contra el alabán de medius que desenroan las colturas de lenguas mayoritarias no puein las delas lenguas amenuías hazel ná, queandu muchas vezis dependienti dela voluntá o mesmu dela calamorrería del palranti gastal dela su lengua ca día. Peru si las nuevas generacionis, alas que ponin un muru pa impeíl que mirin la genti de patrás i si lo hazin es tras dun rigorosu laviju d'ideas, no son manteneoras dela coltura delos pairis i avuelus, pos con el su comportamientu contribúin más alo que dizin "aldea global" que a condural el patrimoniu ereau.
Marcu Ureliu dixu enos revacaerus que lo que no es aparenti pala colmena tapocu es pala abeja, peru no dixu ná dun colmeneru i de que si las abejas zumban de destinta manera infrúi ena caliá dela miel. Que los estremeñus entendamus que la lengua es la nuestra miel i no un engorru sedría más faci con una muación dela actitú i la perda delos prejuízius que mos hazin despreciá-la. No poemus ahilal palantri en un mundu andi no s'entienda que ca lengua, lo mesmu que ca especii, tien una función en el equilibru delas cosas.
