Quandu palramus de xotas, la genti nueva de chopetón s'estomagan i ponin caras de hediondus, cosa assín comu las polcas que tocava Urkel cona cordión deque entrava en cá los vezinus. Se vé comu dessajenu, folasteru, enritanti i aburribli, encassullau drentu delo antiguu, comu aquellu que está enlatau i se saca namás que pa ciertas fiestas, comu un sustén aparenti o la gomina pal pelu. Los moçus no s'arrigan a bailal porque ai muchus prejuízius, los ayuntamientus apostan más polo chillanti con un afán de noveá que no acaba por contemplal a naidi. Sin embargu, ai puebrus i puebrus, i ondi está el empiqui dela música, no ai moa que eschangui los sonis de siempri. Enas escuelas de música s'enseñan a tocal las cuerdas de quitarras i a estripal los botonis dela cordión i enas salas de baili suenan xotas, pindongus o rondeñas. Quandu siembras, arrecogis i el afán de continación de muchus diretoris i biembrus hazin que dendi chiquininus s'empiquin alos bailis. Peru no por mé dela escuela, ni dela sociedá o los canalis de comunicación, esta continación vien del eshuerçu i la tentigués delas associacionis que briegan por esparramal lo estremeñu andiquiera que ván. I quandu ahilan palantri, vemus que hazin añus, comu Alonso de Mendoza, que'l fin-de-semana passau celebró los 25 añus d'enfuncionamientu ena Garrobilla con un espetáculu mu sonau i cudiau i un disquinu llamau Venticincu , assina, en estremeñu, llenu de vivencias i cariñu polo nuestru. I lo mesmu vemus estus a cumpril añus, que vemus otrus a pulal comu los de Anhinojo Folk conos Remansos del Tajo o los de Cantaera Folk pala parti de Coria. Los sonis que los nuestrus avuelus bailavan en jiras, fiestas i casorius i los cantaris que las avuelas echavan quandu divan conos cántarus al quairil i aposaus ena roílla, agora los mantienin las associacionis i grupus, hiziendu una manera d'entendel Estremaúra por mé dela sus músicas.
