Que es bonitu arrecuperal las tradiciones, muchus dirán que sigún sean. Alas vezis la estoria se mienta más que quandu endaña. Por essu las tradicionis tienin un pesu que ena balança puein estronchal la revirijuela formi tengamus o no buenas acordanças d'ellas. Pal casu de Val-de-Fuentis, an pie dela sierra de Montanchi, enos llanus hallamus buen acuerdu. I es que hazi pocu á tuvun a bien volvel a passeal los tablerus polas callis esgrafiás del puebru, peru por qué? A qué ton la necessiá de movel associacionis colturalis i los vezinus, tranquilus enas sus casas, pa tenel una prosseción comu las d'antañu conas virgis aginás con roíllas i varalis ala cabeça al son dela frauta? Pos velaquí. De siempri s'á hechu, peru aluspués del régimi i la emigración, mos contavan los viejus del lugal, la costumbri se despareció. Los valdefuenteñus puein seguil viviendu sinas sus costumbris? Pos cadacé! Peru ya agarrarían otra, quiciá forera comu las sevillanas, el reggeaton o mesmu la kamariskaya, porque aquellus puebrus que pierdin las sus costumbris i las sus recordanças acaban adotandu las d'otrus laus. En el puebru del esgrafiau i las vocalis abiertas tuvun el atinu d'arrellenal el vazíu delas costumbris conas propias costumbris, antis que tiral de cosas dahuera por mucha propaganda tengan. El cariñu polo propiu lleva a querel embracilá-lu duranti se viva, mesmu essas costumbris. Dendi el cascabullu duna bellota paí, desde los xarmientus d'anguna parra o delas aguas de Salol, la diosa dela tierra agraeci estus gestus de veneración i ofretoriu. La coltura tradicional s'empecha deque vei los mocinus i mocinas en el simulacru delo que los sus avuelus conocierun, porque se vá endonandu i lo que aparecía aburríu i escharchizu s'empendola i a pocu a pocu espelecha pa sentil-si comu verdaeru con el afán i la briega dela genti.
