La coltura no tien arrayus ni se puei deslindal, pos siempri es un hilu que vá muandu de colol tan suavimenti que no ai gracis. Namás las imposicionis o las catastrofis cortan el hilu dun tijeretazu escapás de desiquilibral. Quandu el sinu delos puebrus no dependi d'ellus propius i están en otras manus la continación, el retrasu o el estancamientu, facimenti s'entrepeta el carru dela estoria, envacula i se zimbrea la carga con tan mala suerti que lo que era un carruchau con comuelgu, s'embrueca. Alogu, en ahilandu más ligeru, mos pensamus que es que dimus sin cargamenta, sin atijus, peru lo ciertu es que estamus corriendu sin memoria. Assina passó alos puebrus dela Lusitania a dambus a dos laus dela raya alministrativa, condenaus dendi hazi muchu á vivil con el culu vueltu, inorandu lo que es ermanu. Agora las lindis las destraça la economía i sigún topin los tentáculus delas impresas unus sitius o otrus, peru antiguamenti avían otras cosas por cima del comerciu comu lo era la tierra, la coltura, la lengua, las creyencias que dessigían respetu más que qualquiera rei, caciqui o monea. Quien vaiga de visiteu polos puebrus portuguesis que siguin la continación delos enzinaris, alcornocalis i montis estremeñus entiendi mejol esta tierra, porque d'alguna manera supun conserval allí lo que aquí la haronería, el desaculamientu i el'ansia d'aparencia echarun a perdel. Assina apareci lo conformi que estamus con perdel la nuestra identidá, a trocu de querel encaxal no sabemus óndi ni con quién. No tenemus que aparental sel lo que no semus, porque por muchus perifollus de prásticu, chapa i hierru que mos den una fachenda más postinosa i entrincá, no dexaremus de tenel el coraçón ala lumbri dun choçu de piera. Semus ijus dela tierra dela bellota i vivil arreglu a ella es sentil-si en equilibru. No tenemus más misteriu que essi.
