En esti mundu de máquinas, se lleva el vitu qualquiera cosa que contenga las sigras TIC. Cursus, pogramacionis, curricula, adatacionis, propagandas, trabajus- Están por toas partis i es el presenti de quasi tós. En ellas está la sabiuría, en ellas la conocencia, el ahorru i el negociu. Un manantíu d'enteracionis i un ataeru continu. Esta maniobra delas impresas grandis de queal las cosas dela conocencia ahuera delas cabeças delos ombris i que'l razonaeru se quei namás ena albeliá d'achuchal botonis desconcierta i es temibli. Si anguna ves uvu en nusotrus angún sabel, comu lo menúu nel moneeru, acabó echandu-si en anguna tragaperras. Essi afán que tienin dendi arriba (essi 'arriba' que arrenda los diosis cona hybris dun trágicu sin escaldón) paque puli la enseñança molondrona i utomática está hiziendu tantu dañu que las ganas i el interés por aprendel, la golienda están achorchaus i desbandingaus enantis d'acabal los cursus obrigatorius. Los zagalis, derrengaítus intelectualmenti i ahogaus polas gaspachás de manual, a pocu que los dexan palral dizin que pa qué sirvi un tiempu que naidi regala esplotau en passal un dessami. Essu no l'enllena. Los de más caraiti, s'entripan i se revuelvin enas crassis, lo más engurriínus no buscan poblemas i rezan pa sobrevivil enas escuelas i estitutus. Sin embargu, buscan d'ellus tós lo mesmu, con un raeru que ni sabi ni conoci la verdá delas aulas. Si quierin entendel el coragi, palrin ustés con un professol: le contará que no ai tenología escapás de hazel delos zagalis ombris i mugeris respetablis, onestus, trabajaoris, animosus pala vida i comprometíus conos que están al lau i con ondi vivin. Tolo que da la esperencia lo sustitúin las máquinas. La satisfación delos maestrus se midi pol frascassu o sucessu delos alunus, no académicamenti, sino ena vida, pos ellus contribúin cona pacencia, el sabel i el tiempu, más mesmu delo que un cuerpu es escapás de resestil.