Qué celebramus en estas fiestas tan asseñalás enos calandarius? Si paras unu pola calli i le perguntas, te dirá "felís Navidá". Le perguntas a un meritensi de ai venti sigrus, con "mulsum" ena manu te dirá "Io Saturnalia". Un poquinu antis, quandu la coltura celta tenía más pesu, celebravan la ruea del añu, que vuelvi a roal passau el solsticiu. I si miramus más patrás, encontramus que los antiguus s'espurechavan apreparandu-si pa acebil el sol conos días más largus. Celebramus tó essu i más, peru comu muchus delos ritualis delos que ya perdimus la huélliga, las fiestas de Navidá cayerun ena chapurrá delas letras colorás que rezan "Merry Christmas". Las callis s'enllenan de símbolus: herraúras recolgonas, esquilas, muérdagu, pinus de hurramachu, cintas, luzis de colorinis, pavus, mariscu. Ata la "paga extra" era el aguinaldu delos "domini" palos escravus! Qué ai de tó essu que perteneça alos estremeñus? Poca cosa. Enque cogieran los símbolus celtas pa lleval la Navidá a espernacachonis enos renus de papa Noel, no es essa la nuestra fiesta.
Por estas fechas los estremeñus apuran las matanças i los colgaerus s'orean. Con alguinu d'essa chacina se convidan los vezinus pala Nochibuena, día gordu d'estas fiestas pa nusotrus, andi s'ajunta la familia toa. Essa nochi comemus pollu o cochifritu o escabechi quien no tenga possibli. Comemus castañas pilongas i nuezis i s'enduçan los garguerus con prestiñus o coquillus que las mugeris avían por estus días. Cantamus villanciscus cona çambomba, la botella anís, el almirés o el morteru. Los moçus se hatean polas callis en estus días andi le vali tó i la diversión es favorita del comportamientu libertosu. Hazemus lumbris, passeamus cabras horras i la nochi otra ves roa en el rondelinu delos tiempus.
