El fin-de-semana passau se demostró bastanti bien quál es el tiraeru dela sociedá i d'aquellus que agarran la mancera. Sedrá cosa dela condición umana sel ligerus palas diversionis i tardíus palas obrigacionis i el derechu, pos cono primeru s'enciendin los ánimus i lo segundu mos enfastia i mos agalvana. Causamenti ena sociedá andi los deportis nacionalis son la quexura i el levantamientu de falsus, más mos satisfazi embaíl-mus cona pelota que dil alas urnias. Mesmu el filósofu Eraclitu quandu le perguntarun que qué hazía jugandu conos muchachus junta'l templu retruqueó: "De qué vos estrañais, desgraciaus? Es que no trai más cuentu hazel estu que governal entre vusotrus?" Ata Séneca recomendava desaculal-si delas custionis púbricas, él que rigió el imperiu. Desengañaus del mundu, dela ralidá, dela genti namás mos quea que alegral-mus conas ficionis en cata dun espurechamientu que nunca allega. No mos hadría más bien miral en verdá palo que tenemus alreol, esculcá-lu i precural la mejol manera de sentil-mus a gustu mutatis mutandis? Distraíus i desapartaus delo que tien importanti, perdemus el atillu con el ambienti i desnortaus mos dexamus guial por angún comenenciosu. Vos propongu el exerciciu de entendel la hechura delas casas i delas callis, del sitiu delas huentis i las huélligas del javalín en el monti. Vos propongu dexal de desconfial-mus de nusotrus i nusotrus i sel coscientis de ca passu que pegamus, que no múin una piera dela vida sin el nuestru consentimientu. Allá vean los que apregonan i platican el dexal-si dil! Essu da salú quandu el sistema está sanu, peru quandu maletu s'abarranca i los biembrus s'encorchan, aprevení-vus i procurai que no vos agarri pa hundil-vus con él. No querais que la pelota a roal vos desmandi.