Dirán ustés, letoris amigus i enemigus, que cómu andu últimamenti tan mascón i filosóficu. La verdá es que no sé si sedrán las gaspachás cotidianas que se rebullin enos colrichis, los aginaerus dela escrivanía (que se lo digan a Cicerón) o mesmu el polin delos pererus, la custión que unu no puei quital-si dela mollera pensamientus que train a margullu i otrus que relumbran cona huerça dela voluntá. Muchas vezis no semus ciertus de si atinamus conas decisionis, peru creu que menus coscientis semus del dañu o el beneficiu que train palos demás. Acostumbraus comu estamus a decidil arreglu alas nuestras comenencias, prossuponemus que tamién son las delos demás. I velaí tenemus menumentus demagraus, estoria desacreditá, lenguas desvaloreas i genti con tantas canogías i passandu tantas gurruminas enas casas que es mestel preguntal-si quién decidió que assina huera. Quién son los que decidin que ondi ai un olivu se ponga millu i ondi bailan los hurramachus se hagan desfilis? No ai idea que más trunfi entre los estremeñus que la de desaculal-mus de nusotrus propius, curiosamenti escogía delas simientis más aparentis pal abaxamientu i prantá enos surcus dela nuestra mentalidá. Qué bien agarró! I qué viciu vá cogiendu! Verdeguea ca ves que un zagal se riyi del avuelu por cómu mienta las cosas i pula parriba con el istiercu del nuestru propiu despreciu. El dañu mo-lo hazemus nusotrus propius ca ves que mos desaculamus dela nuestra estoria i amorillamus la mata cono que mos dizin dahuera. No sé qué esperan los estremeñus desazonaus que criará essa pranta, peru el frutu sedrá un peru envenenosu que mos encorchará el entendimientu de nusotrus i dela nuestra tierra pa siempri. Si quandu menus hueramus escapás d'arreparal en essa mata heyonda que creci en nusotrus pa arrancá-la i descastá-la pa siempri...! Ná comu entendel que, sin sel más ni menus que naidi, está ala manu hazé-lu, de ná que aprendamus a querel-mus una mijina más de ves d'arrendal o abaxal-mus.
