Qué dañu puei hazel un tambol de jugueti cona bandera andaluza i la virgi del Rocío pintá? Total, namás es un jugueti. Peru quandu lo veis en un estalachi junta carrozas rocieras de jugueti, renti a otru estalachi andi vendin vestíus de lunaris i mascotas (delas que ván ena cabeça) ena romería dela virgi delos Remedius en Frexenal, subliminalmenti, entre granizaus i garrapiñatis, algu está malineandu. En essi puebru de tradicionis antigüíssimas, el grupu delos Jateros, que cumprin mediu sigru ya, no anda ruqueandu, más, sigui con tentigués cogiendu ca día más genti nueva. Gracias a que están bregandu pola coltura tradicional, son un aceru paque las lumbris del sul no prendan ena vieja Nertobriga. Tamién la coltura palas catervas del nacionalismu español sigui a arramplal con tradicionis, sostribau polos canalis de comunicación i el dineru púbricu. Ala par que enos puebrus abrin escuelas de flamencu i sevillanas, amenúin los grupus de música tradicional. Viviendu en una tierra con un patrimoniu musical tan ricu, preferimus los sonis dela quitarra i el caxón, peru no por eleción. Comu tantas otras cosas que proyetan dendi las salas capitalinas, es más aparenti que, ala par que estamus a perdel la lengua materna, tamién hagamus lo propiu cona música i las tradicionis a trocu de sentil-mus refrexaus ena coltura enlatá dela España cañí que vendin alos folasterus. Tan encorchau tenemus el sentíu que ni mos damus cuenta de que mos muarun la miel por edulcorantis artificialis i plontu dexarán de avel preguntas comu las dun amigu de si pa montal-si en un cavallu ai que revestil-si de cordovés, porque ya ena menti estará relacionau el cavallista con el sombreru cordovés, el baili conas sevillanas, las romerías con el Rocíu, se hagan en Frexenal o en Peralis. Con el espíritu engarañau comu lo tenemus, los estremeñus dizimus ave ! i mos desaculamus. Los Jateros, por mucha calol que haga, no. Que dies mil añus dureis!
