En diendu estus días atrás pa San Vicenti a dal una chalra ena VI Semana del Folklore que aprepara l'associación La Besana, pol caminu, diva palrandu con un amigu a tentu delas fiestas que s'arremolinean en el calandariu delos estremeñus los días estus. La carava no diva sobre l'antigüedá, los personagis que salin, qué santu ai detrás o si son fiestas celtas o anterioris: la custión tratava de si cogi mucha nombraía qualquiera delas fiestas estas, poían abocal a desvirtual-si. I es que quandu catarvás acúin llamás del huelgoriu i la noveá (essu que dizin en castellanu masificar) lo tradicional passa a sel un chisti delo que era. El sentíu i el misteriu dela fiesta se pierdin, lo mesmu que'l ritual, queandu lo más resaltanti. El Harramplas en diziembri lo declararun fiesta de interés turístico nacional, santina que con otras categorías, peru siempri d'interés, tienin por toa Estremaúra muestras dela su coltura i patrimoniu. Amás del movimientu económicu que puea de trael pa comerciantis i gentis delos puebrus, estus títulus devin d'envertí-lus en envestigal i divulgal, respetandu la tradición ala par que s'adata alos tiempus corrientis paque las generacionis nuevas sigan celebrandu. Seris dela nuestra coltura comu las pantarujas, mascarronis, negritus, carantoñas, purificás o harramplas son representacionis del tiempu que s'acaba i pa entral en el nuevu ai que espurechal-si: no devin de crial el melu duna costumbri concalecía por causa del desairi que train la pecuña i el postín, el alpisti o el reggaeton. No devemus premitil tapocu esperal que una costumbri se pierda ena memoria delos más viejus pola galvana, gandingueu i, me premitan, la inoracia enduzía dela moceá. Con títulus o sin ellus, las tradicionis son las que son i pretenencin al puebru, peru que muchas vezis precisan del vencijón delas associacionis colturalis o el afán de particularis paque puean ahilal. Sin embargu, no ai coltura que ahili sin conocencia de sí propia.