Las lenguas no se crían ni s'enventan, ván muandu unas en otras sinos palrantis sabé-lu. Salin formi se desapartan en el tiempu, ena estoria i nel usu, entangandu un estalachi gramatical i coltural arreglu al passu delos palrantis, sin que'l atendimientu alos datus i las lindis los acientin.
Ena almiración con que se tien la lengua, siempri añuá ala coltura, se puei por mé d'ella entendel el pensaeru delos estremeñus. Velaquí que se destaca qué: indina oyel una pessona que diga "essu está mal dichu" o "essu no essisti": es comu si dixiera que tapocu essisti el puebru de estremeñus que generación tras generación divan queandu essas palabras en el enrollau dela lengua, costruyendu duranti sigrus el caminu dela nuestra ralidá. Por essu no entiendu otra manera de mental al cascabullu que cascabullu, ni más çaguán que al çaguán, ni más pegas o arvillas que las que veu aposás enos cordonis dela lus o desbagás en el pratu. Mentá-las d'otra manera sedría palral otra lengua que no es la que los mis avuelus conocierun i usarun. I velaquí-lu, los estremeñus palramus mal quandu queremus llamal el "poyeti" "alféizar", los "garrapatus" "vainas", una "cara estiranti" "rostro terso" i dizimus "mi niñito" quixiendu dizil "el mi muchachinu" mentris que los estremeñus viejus se susprendin de que mos hagamus entendel tan mal conos nuestrus semejantis. Semus unus celtas a querel palral latín de Roma, unus espartanus a alampal pol áticu i se riyin dos vezis de nusotrus: la primel d'ellas, por querel aparental lo que no semus, i la segunda, i más alamentabli, por desprecial lo que sí semus. Assín es comu se mesturan i se muerin las lenguas, insolviendu-si ena fachenda del arriendu i el abaxamientu.
