Agora que entra esti tiempu que agalvana i que ni la higuera más tupía da consuelu alos cuerpus assolanaus, no entiendu essi aginaeru dela genti por dil de viagi a esparigil-si largu de casa. En bandu, ahilan palas prayas, enque ya muchus prefierin de queal-si raneandu enos ríus i presas estremeñus. Essi es el concetu modernu del ociu: el raneu i el ponel-si de herruciu a tisnau en cata dela vitamina D a emboçás. En fin, una especii de volveeru al origi más animal, de tranquilera, an pie del'agua por mé delo que s'espurecha el cuerpu (!). Sin embargu, essi ociu no casa cona inactividá, pos es un ociu falsu. Comu tolas cosas del mundu globalizau, hata el ociu es vendíu en lata. Mos vendin ociu comu si huera, velaquí, una botica pa cural los malis del trabaju de tol añu i alogu, dispués del cuerpu acostumbrau, lo cambian por una dosi huerti de Rutina en cáussulas concentrás.
Son las cosas que trai san Juan: fiestas enos puebrus, s'acaban las escuelas, s'abrin las piscinas i la metá del mundu se muevi ala otra metá i al revés. Ya no quean essus ritus del'agua i del huegu que son la otra lindi del añu más que comu una anégota. Pa encontrá-lus, tenemus d'espurgal entre conciertus que son una ofensa al oyíu del ombri, geringonçás con animalis que farrungan qualquiera ententu de demostral que tenemus acordura i remeus que incultan tradicionis milenarias. Con estus disloquis, encontramus fallas en Prasencia, quemas de capaçus con señoríu o un axedrés dessagerau. Mesmu las choscas atrain el turista lo mesmu que una polilla. Si es que san Juan es el lazu que adorna el paqueti vacacional! El veranu lo abrin assina, con pogramas que son el retratu duna coltura empernía, charramandusca i escorjá (no lustrosa, prural i ergullosa, comu muchus la sientin i quierin hazel-mus vel). Estamus encoscaus en un modelu coltural mansiolu i assujetau delas moas, de má que la essencia s'esbarruca en un mundu que visti la su entidá conos los pingallus retaceaus dun comerciu de marca.
