En el correl interminabli delos Carnavalis no sabemus mu bien quándu s'acaban los dun añu i prencipian los del sotru. Los preparus delas combarsas palos Antruejus siguientis s'enlían cona polpurina, tisnis i gorrus ressaltantis delos presentis. Está curiosa la manera que los hurramachus, viejus i pantarujas, mesmu los que se vestían d'estremeñu pa estus días, ya namás son recuerdus que se ván recalcandu en el pensaeru, hostigaus delas corrientis brasileras i descabrentaus delos sonis dela olla i los tamboris. Essa locura sana del zagal a revestil-si conos trapallus de casa i hazel una porra con un calcetín rellenu i harreal a tol que se pusiera por delantri lo mesmu que hazían los lupercus romanus cayó por culpa del passu milital del desfili de Carnaval. El ahucheu garrasperosu i el chisteu espantibli lo silenciarun los sonis marcialis delos tubus, los tamboris i las trompetas. Ata aquella fechaúra sin cerral que era motivu dun sustu en el passillu de casa por entral las máscaras apregonandu la trasmutación delos valoris comu diría Nietsche queó fechá pal disloqui d'estus días. La militarización duna fiesta que lleva drentu la simienti del barullu es, lo miris pondi lo miris, una contrariedá. El desfili, la música de marcha, el baili acompassau, la vestimienta déntica, la espectacularidá, la disciplina, el certami, el enfrentamientu entre puebrus, el sentimientu de vitoria o derrota, el sacrificiu en huerças i tiempu, la voluntá- son demasiaus componentis comu pa palral duna fiesta que trata d'altereal el ordin i no de crial competencias, juraus i juezis. Al niñu holgacián, revoltosu i ganforru del Carnaval lo obrigarun a hazel-si mayol pusiendu-lu en lómina i a trabajal a rompiuessu. Ni un resuelgu pal'alma acorricá i languiosa delas pessonas mayoris . Quiciá por causa del disloqui cotidianu i hartus delos perdularius a oju vista precisamus del ordin carnavaleru, qué sabemus allá!
