La estoria ahorma la genti i la genti es la que múa la estoria. Pareci que los chascus que l'están alas pessonas las ván amoldandu comu si los aconteceris hueran la cincha que al reol de nusotrus mos aprimi, mos relaxa o mos enhorma formi passa el tiempu. Quandu estamus a vel el comportamientu duna sociedá, no pensamus enos hechus que la llevarun a pensal assina i semus ligerus, comu lenguaronis, o peol, comu bocalanis, a mental cosas maginás i a guial-mus más polos prejuízius que pola ralidá.

No entendemus el caraiti delos estremeñus porque no sabemus la nuestra estoria: entovía sigui enterrá enas dehesas o farrungá pol desaculaeru. No apercebimus por qué en Estremaúra está tou tan largu i bandeá-la es atravessal paisagis que mos palran conas vozis delas bellotas i las xaras en idiomas que agora cuesta trebaju d'entendel. Acontinamus sin sabel óndi hue la batalla de Zallaqah, si Méria estava ya renti Guadiana enantis delos romanus llegal, por qué la enquisición achacinó tanta genti en Frexenal quemandu-las ena lumbri o mesmu por qué en el Canchu Roanu está l'Acrópoli dela Iberia antigua. La nuestra estoria duermi abarullá en archivus con papelis tracamundeaus, esparramá enas pieras sin escaval, enos corralis delas casas i enas entrás de cortijus centenarius.

Escamuflaus en estorias, alicantinas i chascarrillus delos viejus hallamus episodius delas creyencias del puebru, sin más adornus que'l entretenimientu del seranu. En essas mentacionis delas gentis de patrás descubrimus topónimus i costumbris milenarias que hazin la estoria del puebru, siempri largu del citoteu de palacius i de decisionis tomás de genti que ni sabin óndi cai la Estremaúra. Mucha es la lavol de coronistas, arquiólogus, filólogus, envestigaoris i associacionis colturalis ena Estremaúra del olvidu, una briega que, sin estal valoreá, llevan ala par que'l passu delos añus aborra la palabra i el recuerdu delos puebrus que crecierun i escaecierun aquí. Está el sentimientu amogonau de pertenecel a una tierra que engrandeci las almas de quien la conoci, aspera del son del dispertaol.