Güeli a veranu. Ya las piscinas abrierun pa consuelu de grandis i chicus i las maquinarias s'afanan en destendel arena, amontonal rollus i limpial orillas enos ríus trasparentis paque el ociu ponga allí la tovalla i los pellejus a recalental. Entre'l estropel delos zagalis a çampullil-si, s'escamuflan las andorinas a acarreal comía palos níus. La ceguta s'abraça alos charcus con el mesmu afán con el que los granalis aflorecin. Las senaras de regueríu pulan al son del grilleu i el palpaleu. El campu rebulli mentris que'l pesu delas morralas cargás de librus i quaernus que nunca volverán a sel aparentis se safó ala espera delos morgañus. Los zagalis, dispués de nuevi mesis cercaus, saborean la libertá que ofrecin los polus de colorinis i haraganeal sin pensal enos dessamin ni enas leturas forçás ni enos trabajus buscaus en internet. No quierin ni escuchal mental de calculaoras, ni regras, ni aguzalapis: agora la bici, las facatúas al serenu i las oras muertas con el mobi. Con una poca de suerti sedrán escapás de mandal mensagis con menus faltas d'ortografía que ai un añu.
La coltura de lata delos estitutus precisa de buenus entrépetis que hagan aparenti lo más insussu, peru ni conas piçarras digitalis ni los proyetus que sirvin pa arrellenal cassullus enos papelis que dessigi la burocracia se consigui. Si la educación tuviera çucessu, vedriamus los zagalis morriñosus en estus días, dandu-li igual las notas, peru no los compañerus, los maestrus o tolo entanguilau enas crassis duranti nuevi mesis. Peru comu no tien, no sirvin las vivencias ni lo aprendíu, namás lo valuabli que s'asseñali nun papel: es lo que vén los pairis i delo que dan parti los maestrus. Dispués dun cursu d'esprimentus cona lei nueva, vá arrematandu cona insegurança de qué passará pa setiembri: comu la educación delos muchachus dependi dela comenencia política i no dela propia capacidá del ombri de comunical i aprendel, estamus abocaus al frascassu comu sociedá. Essu sí, con sandía fresca se lleva mejol.
