Si dixieras "chacharela", "malotía", "tarabilla", "achorchal", "balandrán", "charabasqueal", "enclaraol" o tirara una piera "a sansabanilla" te davas a entendel conos serraillanus i delos puebrus d'alreol del Monfragüi. Si perguntaras pol parqui los Pininus o la calli del pai Juan, la Crus del Siglu o la Huenti'l Capillu o algún perdutal ondi aigan xaras, qualquiera viejinu dela Serraílla t'endilgava en estremeñu si por essas cosas procuras. Allí te darían norti de poetas ilustris que cantarun los milagrus del Cristu, el caraiti delos serraillanus o las fiestas que tienin. Te mentarán delos que esparramarun el métodu Rayas, con que tantas generacionis s'enseñarun a escrevil, o dela revista El Migajón. Muchus chascus que l'estuvun alos vezinus dela Serraílla te referirán del ganau que tuvun, delos molinerus, delos cavallus, delos lobus, dela siega, dela hechura delos choçus, delas curas con sandijuelas, d'alicantinas de patrás...

Essi haci dela estoria, las creyencias, la lengua i la querencia compón el sentil dun puebru. I precisamenti delas estorias que se cuentan, nació el proyetu a tentu dun bandoleru, que dizin el Cabrerín, que corrió las sierras del Monfragüi, ahuyendu delas manus delas autoridais. I comu los serraillanus son assina ellus, vidun bien acistal-si el faxín, queal-si las barbas i aparejal las yeguas i delantri duna cámara revivil un puebru enteru la estoria del Cabrerín. Conos endilgus de Néstor del Barco i José Ignacio Cobos i los avíus dela produción dela associación "El Duendi: en cata delo nuestru", la estoria del Cabrerín se hizu penícula gracias que los vezinus del lugal s'ensayavan pa graval la primel penícula en estremeñu. En veranu la estrenarun en el campu fubu dela Serraílla, que nunca conoció tanta genti junta. I agora, pulandu pulandu, llegó el sábau passau alos Mairilis, al Teatro Goya, enllenandu los assientus i mentandu-si en una tupa de caenas i canalis de comunicación.

La Serraílla de siempri tuvu un ánimu desinquietu, i la su genti, dispués dela penícula, bien poía descansal si no huera que essa desinquietú no s'alimentara de trebaju, comu dixu Titu Liviu. Más proyetus que llevin el hierru dela Serraílla vedremus, porque en essi puebru alampan pola coltura.