A primerus de noviembri ca añu celebramus en onol delos nuestrus muertus el día de Tossantus. Enque entre los puebrus antiguus se hazía en otras fechas, la fiesta era la mesma: la familia rindi cultu i memoria alos familiaris de patrás ya muertus ena idea de que por está-lu, son seris santus. Los romanus los llamavan lares i genii, los griegus h?r?es i daím?nes i s'onravan drentu del sentimientu religiosu familial comu diosis muchu antis d'essestil Zeu, Jupiti o Dios.
Tamién por estus días, quandu los celtas celebravan el Samhain, los estremeñus mos esparigimus en tradicionis comu el Magostu, la Carvochá, la Chaquetía o la calavera'l Conqui, avezaus a ritus milenarius que train el cambiu de tiempu. Ai menus oras de lus i los zagalis en puebrus comu el Montiju o Quintana vazían sandías, melonis i calabaças que, alumbrás con velas, llevan en prosseción polas callis escuras cona cantiquiña dela calavera'l Conqui. A muchus le sonará estu propiu del Halloween, peru los nuestrus puebrus llevan sigrus a hazé-lu. Conos frutus d'otoñu, las regolfas de muchachus aprovechan estus días pa dil en casa en casa a peíl con cantus la chaquetía i arrecogel un bolsau de castañas, granás, nuezis, bellotas, açucecias o duci de bembrillu pa comé-lu nel campu. Tamién sonará estu al trick-or-treat delas penículas estaunidensis, peru los zagalis lo llevan hiziendu dendi antis del cini llegal aquí. En el campu, velallí, se prendi el huegu sagrau o Magostu andi s'assan las castañas. Con destintu nombri, peru mesma cosa, llamamus la carvochá o carvotá que asseñala el carvoti, el frutu assau.
Tolos ritus estus echan un baqui con el Halloween que trasmina ena nuestra sociedá entre los más nuevus, mesturandu i trocandu. Aborran entre maquillagis, máscaras, zombis, trick-or-treat i fiestas de discoteca el verdaeru sentíu d'estus días por causa del acolturamientu del gaspacheu.
*Ismael Carmona García.
Presidente del OSCEC
