Dizía Maquiavelu "è un desiderio veramente molto naturale e ordinario quello di voler acquistare". D'essu sabemus mu bien los estremeñus, que dendi ai muchu contribuyerun ala conquista de tierras i gentis de mu largu pa cumpril, mejol dichu, pa servil. Es por essu, porque lo hizun sirviendu, cómu los estremeñus i con ellus otrus puebrus púun salil d'estas tierras bravías pa otras más entovía dispués que'l ganau las romiara i otras manus se las apropinquara ata alampal con ellas. No veu diniá en hazel ahuera con otrus lo que aquí hizu el vezinu con nusotrus. No ai grandeza en essas hechurías que alevantarun palacius i ilesias aparrandu l'ambición más delo que abarca el braçu. Tapocu no ai satisfación ena larzina que obriga a aballal un alaván de pessonas del briçu ni d'animalis por causa del'ansia dunus pocus. No ai equilibru en un'alma que si está hecha pa mandal, abusa, ni ena que está hecha pa obedecel, s'acoguta, porque la conquista se has esterna o se recibi, peru en nenguna d'ellas el goviernu se da d'unu propiu. Es más faci sel mandorotón o mandilón? Manigeranti o un mengaju? Ná más tristi que passal duna condición a otra con un espíritu enconchavau que, de ves de hincal-si i arreparal, le gusta más d'arrendal lo que vé. Ondi quea el gnôthi seautón , motol del mundu? La dotrina lo pusu borronosu palos coraçonis delos ombris no envernecel ni en primavera; Mesmu meló la paré del pensaeru con letras grandis andi se lei: "el tiempu de vagal lleva a tenel malus pensamientus". Mejol ponel la teli, no sea cuentu que mos conquistemus a nusotrus propius i dexemus de tenel tantas precisas! Se mereci el estremeñu perdel, por essu, la su coltura? Pos no menus que otrus puebrus que, en siendu ya cosmopolitanus por tenel un conocimientu del ambienti, se piensan que hazel lo que tós trairá pogressu. No ai avanci sin equilibru ni equilibru sin conocimientu. Si Maquiavelu era ciertu, essi deseu devi de dal-mus el vencijón pa conquistal-mus primeru por drentu.
