Quandu el poblema que más precupa ala genti es si tuvun que sacal roxa o no o quandu un puebru puei paralizal-si porque jugan dos equipus sonaus, poemus soponel dos cosas: que'l mundu es ca ves más insussu o que'l futuru está pendienti del partíu essi. La tontuna coletiva, el embastecimientu del caraiti i la vos amontesá que s'avança contra las televisionis de milenta de tavernas enos días de fubu gordu pareci que da contestación ala nuestra soposición. Dava igual andi hueramus el sábau passau: el universu s'encorujava entre penaltis i gañíus. Por mesteris del'associación, anduvimus el otru día al Guiju de sta. Bárbara alos rehuíjus del Viriatu, entre las aguas dun cielu atrubilau que convidavan a queal-si en casa haraganeandu más que a engarrafal-si pallí. Peru, velaí, sin sabel que era un partíu essi día i que venían los de Emerita Ludus Gladiatorum, hue dobri la suspresa. En un prencipiu, l'atuación delos gladiaoris alevantó el espíritu essi que alampa pola sangri, entre'l vozeu i las ciringoncias del púbricu. Mesmu (paradoxas del tiempu circulal) hizun essa representación ena praça de torus del puebru. Avía una cierta katharsis primitiva nel torteu i el bulliciu que hurgava lo más hondu del ánimu cona aijá dela violencia i que enfuscava el homo sacra res homini . Namás el romanu a tiral retrataúras distraía del golpi i los cambaluzis. Sin embargu, no era aquella comedia la que desahuziava la fé enos ombris i farrungava las pocas señas de volución que creivamus tenel concedías. Era entre los pitazus i carpíus del partíu, los vítoris de zagalis i mayoris los que empataratarun las fiestas de Viriatu, reduziendu el tiempu de chalras i retrasandu la prosseción conos fachus al son delas gaitas de Veritas Nostra. Resultava inuti el gañíu de "Viva Viriatu!" quandu los demás namás retruqueavan "Hala Madrid". Ni la falcata puei contra la coltura de lata, ni las gaitas, ni la lluvia. Ala cerca delos borregus ca día ai que añidil más angarillas.