Es compricau encontral la coerencia en un mundu ca ves más tracamundeau i desnortau. Andiquiera que miremus, la contradición se destiendi comu un mal hongu en el surcu. La tupa de vezis que tenemus sentíu aquellu de "pa unas cosas, sí i pa otras, no" o "pos no dizin que semus igualis?" Alas vezis mos movemus por envidia i essi es el motol dela voluntá delos que se rebullin quandu no encuentran más causa que la del "yo tamién". Otras, la indinación ahinchona el coraçón i no quea más que señalal-si i dissalil pa dil a pocu a pocu arrecuperandu el sentíu delas cosas. Salil pa huera i tomal-si cuenta del mundu no es tan compricau. Los poblemas que mos embarullan i mos embasquillan el conocimientu mos quita de vel la geringonçá que es encontral entretenga i devertimientu matandu un toru, envenenandu un arvu, comiendu lo dallí mentris lo daquí se puiri. En estremeñu tenemus una palabra mu aparenti pa tó estu, que es amoragal: senifica hazel las cosas depriessa i mal. Peru el su sentíu verdaeru está ena "matança del animal" i en el "assaeru de carni". El animal golpeteau i la pessona lastimá i anegralá dezimus que están amoragaus . Tamién quandu están asfissiaus i mesmu quandu apreciamus la mangria en el ánimu del'ombri dizimus que está amoragau . Ata hazel una facatúa es hazel una moraga ! Con esta palabra definimus lo que el ombri has contra el mundu i contra él propiu. El amoragamientu mos troca i vemus lógicu lo que no tien razón nenguna i al revés: amoragamus porque amus perdíu auténticamenti la razón. Agora que ya no aprendemus alos zagalis a entendel el mundu i a guiá-lus paque ellus mesmus lo comprendan, más bien le damus el mundu cortaínu en lascas finas dun embutíu con conservantis i globalizantis, estamus firmandu el contratu pa un futuru entovía más amoragau. No ai educación eno que mos pograma, no es arti lo que mos embasteci, no es sustenibli la vida que afarfalla. Amus a tomal atranquiju a trocu de seguil ruqueandu.
