Ha venío a visitalmi el Alcaldí
con otrus señoris mu remuainos,
con corbata y relojis de oru,
¡y me han dau la mano!
que se me jaci a mi que estus buscan algu,
y mi padri a de ser quien me diga lo que esta pasandu. Preguntele, y me diju, que no jiciera caso,
que lo jacin na mas pa engañal,
solu por el interés,
que una vez se colocan, ya ni saluan,
y levantan la gaita mu alto como si le debieras algu.
Hora si, hora te montan en un autocar,
te dan un bocaillo y unos banderinis con los sus coloris,
te llevan a la capital a la plaza de los torus
y allí que te sueltan de toas sus arengas,
y tu pa jacel bulto y pa aplaudil
¡pues to eso es mentira!
y te jicin que unos son los güenos
y otros son los malos
y son tos lo mesmo,
que despues de las eleccionis
jacen el alboroqui y se olvidan de tos,
y en los cuatru años se jacin apaño,
lo que a ti te cuesta una via de suores y jechal muchas cuentas
ellos se jacin chaletes y colocan a toa la familia,
a toa una partía de zanganos
que se jalan las nuestras perritas.
A ca instanti se jan un conviti,
a ca instanti se jan una juerga,
y se jincan jamonis y gambas,
y wisquisis carus de esus de marca,
y pasean en cochis que tien mas caballos que toa la dehesa,
y se tian la mañana paseando y tomando cafésis
y diz que trabajan,
agachando los lomos se vieran
picando canchalis y arrancandu jaras.
Y se jartan de ponelnus leyis
que diz que vienin de la Unión Europea,
si pa tenel cuatro cabras
hay que tenel mas papelis que un maestru escuela
y asín se queman los montis enllenitos de maleza.
Y hogaño la matanza se le compra al carnicero,
porque en viajes pa guias y pa sus enrreos
mus salin carus los cerdos.
asina se pierdin las cosas, asina se pierdi lo nuestru
con toas esas leyis que naidi sabi pa que las han puestu.
Hora diz que se quejan, que si no tien dinero,
que me güeli que siempre los mesmos
habemus de pagal esta deuda.
Por eso te digo hijo miu
que al colchón han de ilse las perras,
que han de ponersi las cosas peol que en la guerra.
Hora jacin florituras, pa que tu los veas,
pa que los apoyes, pa que nos convenzas.
En verdad hijo miu te digo:
que por mucho que digan que jacin
lo único que quierin es aumentar su jacienda.
