La primavera, essi mesmu tiempu que trai el abejorreu entre los frutalis i entre las mapolas i las xaras, es escapás d'atrael velaquí lo que nusotrus llamamus visiteu i que ena lengua común dizin turismo . No es porque Estremaúra se ponga arriscaína pa estus días, porque ca tiempu tien el su encantu i lo mesmu clissa la follarasca dela toñá que las senaras verdis delas vegas en veranu. Sin embargu, essi mesmu sistema que has que comamus espárragus chinus i tomatis de Marruecus, essi estalachi tan bien assentau ena sociedá ondi lo largu es cerca i lo cerca inalcançabli, es el que trai viageras cargás de leonesis o francesis pa vel los cerezus aflorecíus i retratistas de mu largu pa esculcal la rosa-d'Alexandría an pie d'Olivença. Retratal la naturaleza muevi alavanis de genti por tós laus, porque vivimus más ena representación delas cosas que enas cosas mesmas. Essi recuerdu de pixels que ençonchamus enas memorias delos cachaparrus informáticus pa cientu i un añus i del que semus gustosus de compartil con el mundu por mé dela redi es la manera que tien el ombri d'agora de dizil: yo estuvi allí . En estas custionis andamus los que con más o menus suspresa mos engamonitamus entre las florinas bravías delas vereas, el chufardu farrungau o el molinu comíu de yeira. Quiciá que quandu mos encontramus con una calapachá de retratus tupiendu carpetas i pensamus que precisariamus d'otra vida pa vé-lus tós i recordal-mus delas vivencias, el'alma s'engajera i sienti que'l tiempu se destira a piqui de desboronal-si. Essa ansia de querel guardiñal en casa lo que ai en el mundu no has que'l mundu mos caiga más cerca, tolo contrariu, lo copiamus i sentimus ena copia una possessión i en el damientu polas canalis informáticas una muestra dela nuestra generosiá aobá ena fachenda i el afán de crial envidias (semus assina de malus!). Resulta compricau entendel el ombri modernu i la su relación con el ambienti sin más almiración que la d'estal de mirandiqui i conocel enos demás lo nuestru propiu.
