Si ai algu que machuca la identidá delos puebrus son los tópicus i mitus que sobre ellus corrin. Estu puei passal dendi un endividu ata una nación entera: mos cuelgan la etiqueta i dimus in saecula saeculorum a tiragatu con ella. Muchas vezis estas etiquetas se gastan pa dal propaganda o pa abaxal la genti, criandu un jeitu maginariu delo que es en verdá. Estas almiracionis que falsean o desprecian el passau brotan en muchas caravas produziendu partidarius cérrimus i relatiñas que están abocás a descalientus. I alogu está quandu lo dizimus sin maldá nenguna i resulta que tien una nacencia eno más escuru dela estoria. Velaquí lo que alegrimenti mos llamamus entre nusotrus i nusotrus "belloterus" i "mangurrinus". Quiciá que a muchus le disgusti sabel que'l ajetivu "belloteru" en estremeñu de siempri s'á gastau p'asseñalal al probetón que tenía de dil a bellotas pa poel comel algu, sitación que de juru vinu tras delas guerras que Estremaúra sufrió, prencipalmenti, dela guerra de restauración con Portugal i que mos hondeó palos tiempus prestóricus que cuenta Estrabón delos íberus. El trigu pal exércitu, las bellotas palos estremeñus. Tamién a no pocus l'escueza sabel que los mangurrinus vienin de "manus" por sel antañu assina llamaus con desairi los bracerus. Esta mesma raís la vemus en palabras comu "mangutu", "manganti", "mangalochanu" toas empreás pa llamal la pessona torpi, froxa, farraposa i vaga. La metáfora de que Estremaúra es una bellota ondi Badajós es el frutu i Caçris la "mangurria" --señoris, essu lo llamamus cascabullu-- son aleginis. Más entovía quandu los belloterus i mangurrinus los apuntamus arreglu a una división provincial d'apenas dos sigrus que hizun sin criteriu coltural ni estóricu nengunu. La estoria esprica las palabras i las palabras esprican la estoria (quandu ya la tenemus olviá).
