El miércolis pola nochi me senté al frescu cona maca. No por ná, más que por aprovechal el únicu día menus calorosu que tuvimus esta semana i guardal essa mijina d'airi ena piel i el passagi delas nuvis ena retina pa quandu el sol mos asfissii i mos ciegui. Vidi la postura i cómu los luzerus divan declarandu-si entre las nuvis dun tecíu mu lefi que s'esfarrapavan. Polas parés batallavan los santurrostrus en cata de bichinus, anguna cocaracha que por enxambris salin ala nochi delos çumierus i cometías o angún grillinu desapreveníu. Las hormigas sacavan tierra pola boca delos hormiguerus, téntigas i ardilosas, picandu tamién a otrus bichus, páxarus o mesmu alos propius santurrostrus. Los pínfanus cona su sinfonía castigosa precuravan la sangri delas coyunturas, los deus o los tubillus desinquietandu. Esti añu ain muchus. Ca añu ain más.
Sin embargu, ni estus pensamientus insussus ni el passu despaciosu delas nuvis puein desapartal-mi delas desgracias dela semana. Entran los ahuncus i el aginaeru que aprimin el pechu. Enas caravas toas, los mentamus. Séneca, sin embargu, precura consolal dixiendu que la naturaleza hizu común lo que era más penosu, a trocu de llevá-lu ena igualdá dela mejol manera. Inclusamenti, el raeru dela muerti has que tós seamus igualis, muandu tó i tous. El vivu múa de condición i los que aquí se quean devin d'aprendel a vivil cona assencia, custión que namás el tiempu i la pacencia tienin el títulu de maestrus. Comu dixu una vezina que acuyó a casa a dal el pésami: no es lo que unu quiera, más bien lo que es lo que ai que querel. Siendu la perda lo que es, compricá amistá forma, sin embargu, ata la soledá acaba prefiriendu-si, que no el penaeru dela enfermedá. La cabeça á d'enseñal-si a distrael del coraçón el dolol, engañá-lu, paque guardi las recordacionis que, quandu la falta se sienta menus, sean las que alegrin i no las que apenin. En pas descansis, titu. En pas descansis, primu.
