Ain puebrus faltus de costalerus i otrus que se desvivin polos santus. Unus ondi la religión se midi pol visiteu i otrus pola devoción. Quántu tiempu tardarun los antiguus en queal aburríus los santuarius d'Ataecina, Borus o Trebaruna? Agora que las únicas diosas son Hambrina i Aparencia cuesta entendel qualquiera delos ritus paganus o cristianus, tantu o más comu las lenguas amenuías, el trabaju artesanu, los uertus i los tapaus. Ná de essu sirvi en uviendu comercius grandis andi echal la tardi, palroteandu delos realities i del modelu más chic o cool que vistin los famosus con sueldus que son un ensultu palos trabajaoris. Preguntal al carpinteru pa qué has morterus i machas, al artolanu pa qué pon frijonis verdis i al cabreru pa qué guarda cabras puei tenel comu contiesta: porque me gusta i no hagu barru i encima me pueu comel una tortilla de herretis con un cachu de quesu. Preguntai al cristianu pa qué crei i dirá que es custión de fé. Peru preguntai al que palra una lengua amenuía pa qué se molesta puyendu palral castellanu es, en el peol delos casus, un calamandruñu, un bastu i un buhíu, en el mejol un románticu. Sin embargu, caúnu vivi ondi vivi i essu lo condiciona, por mucha matrix que la teli mos venda, seguirá saliendu de casa i vedrá una alberca, una verea, una pega, un regatu i el monti, enque viva en Caçris o Badajós capital. Lo dela teli es pa tós lo mesmu i acabará passandu: peru la estoria i la erencia coltural delos antiguus es provincia i única. Desaculal-mus dellu pa preferil las caravas televisivas es abraçal un mundu mortanzinu ondi pa estal alegris ai que arrendal lo que darriba digan i que mo-lo acabemus creyendu. Quien preguntin polo aparenti delas lenguas amenuías, quiciá no sea tardi de más pa ellus i puean comprendel que la variedá da el equilibru. Precupacionis mu grandis pa estal de quinzena, mejol pongu la teli, que m'agina i m'entretién al trebolillu.
