+
Accede a tu cuenta

 

O accede con tus datos de Usuario de El Periódico Extremadura:

Recordarme

Puedes recuperar tu contraseña o registrarte

 
 
   
 
 

El ventril del Taraballu

 

ISMAEL Carmona
24/01/2016

En Nava'l-Conceju, a renti del ríu Xerti, se celebra en san Sebastián una d'estas costumbris paganas que tantus quebraerus de cabeça da alos antropólogus: el Taraballu. Espasma cómu s'arrebuja lo paganu cono cristianu. En san Sebastián, dispués delos preparus delos días anterioris, se has missa pol santu en presencia del Taraballu. Duranti sal el imagi de san Sebastián con el ramu de naranju pola puerta dela ilesia, los zagalis asperan an pie dela crus el Taraballu. Antiguamenti le tiravan naranjas, verças i mondajas. Bailava tamién enantis al son del tamboril i él mesmu llevava unas castañuelas grandis mirandu el santu de frenti, aparecíu a comu son los lançaoris de Frexenal. Con ellus comparti algu dela vestimienta, pos el Taraballu tamién vá de brancu i colorau: brancu el hatu, aspecii de monu, con tolo demás colorau: bolronis delantri, puñus i baxeras, la estrella de seis puntas bordá en el pechu i braçus. Ala espalda, un reondel con un muñecu, tó colorau, i por baxu, ena parti del rabillu, la palabra BESA. Pegau al tragi, un picoruchinu brancu. Ai tiempu tamién s'antruejava con una careta. Muchachus, moçus i viejus procuran de dá-li una palmetá enas espaldas cuandu se descudia. El respondi con un vergajazu que harrea con un ventril d'espartu endurecíu, hiziendu que la genti no guardi el ordin ena prusseción, corriendu pa un lau i pa otru. En ves en quandu tiraoris pegan un escopetazu al airi, salvas que rebumban enas callis estrechas del puebru. Namás conservan la tentigués el colru de cantoras que, con un son más apagau i despaciosu que comu cantan en el Harramplas, ván tras del santu con una copra aparecía. La prusseción ahila polas callis prencipalis a otru passu i sin acabal d'encaxal con el correteu del Taraballu i el silvíu del ventril. Fiesta comparanti ala Lupecalia, al Harramplas, alas Carantoñas, ala Borrasca... ritus paganus que sirvin pa hondeal con el iviernu i entral purus ena primavera, trocaus de día, pa casá-lus cona ilesia.