Lo ancestral tien siempri algu d'escuru i s'ahonda enos recuéncanus más arrescondíus de nusotrus en el luchi continuu entre lo dionisiacu i la lus d'Apolu: dos partis duna mesma cosa que no siempri comprendemus bien. Es por essu que precisamus siempri de dil alantroti delo que se quea ena aparencia, atravessal velaquí con otrus ojus el ritu que palos modernus resulta incompresibli. En angún momentu dela estoria delos puebrus entiendin por qué s'espurecha con huegu o con agua, por qué ai un colol i no otru, pa qué sirvi essi son o aquessi baili. Agora no sabemus del animal, ni dela naturaleza, ni delos sentíus i es cenzillu cael en el desvaloreu. No contribúi la sociedá del ombri modernu a aprofundal ena tradición, porque lo empataratan milenta de enreínus i entretengas. No ai afán nengunu dendi lo que dizin educación pa crial, pa ahinchonal l'albeliá i hazel comprendel el porqué delas cosas i los tiempus: más faci es mandal que estudiin jangás paque sean el día de mañana buenus borregus i se dexin dil detrás del campanillu que más retumbrea. Tantas generacionis a obral sin coscencia, a miral sin vel, a sentil sin recordal, son agora algu aparecíu alo que Primo Levi alamentava del ombri. Namás el espíritu amontesau comprendi la razón delas algállaras del robri, aprecia el pucheritu del agasillu o valorea la bravés del machu que se cría enos puertus sin ataharris. El ombri modernu cría más, peru comu no lo has con essa parti honda i lindera entre la sombra i la lumbri, no atrasciendi: no es escapás de trascolal ena continación del tiempu porque ena criación no ai animal, ni atillu, ni sazón. Cómu vain a rehundil las acionis del ombri que farrunga sin entangal? No puei, porque en el desarrollo ai más farrungamientu i menus umaniá i si ai algu que es propiu del ombri es la criación, mesmu delas mentiras enas que vivimus. Tamién essas mentiras tienin una razón honda i precisan d'endilgus.
